SSP .
SSP er ein tvørfaklig samstarvsskipan millum fakbólkar, ið fáast við børn og ung í Føroyum.
Heitið, SSP, er ein stytting fyri høvuðspartarnar í SSP-samstarvinum, Skúli, Sosialir myndugleikar og Politi (løgreglu). Virkisøkið hjá SSP er øll børn og ung frá 0-18 ár.
Endamálið er at savna, samskipa og fremja felags fyriskipanir, sum skulu fyribyrgja kriminaliteti og skaðandi atburði millum børn og ung.
SSP-arbeiðið verður skipað í trimum stigum:
- Alment: Arbeitt verður fyribyrgjandi fyri at menna hugburðin hjá øllum børnum og ungum, og fyri at menna førleikar teirra at taka rættar avgerðir.
- Serstakt: Arbeitt verður málrættað við bólkum av børnum og ungum, sum sýna skaðandi ella kriminellan atburð.
- ·Einstaklingar: Arbeitt verður við einstaklingum, sum hava framt lógarbrot og/ella hava álvarsligar trupulleikar at dragast við.
Virkisøkið hjá SSP-lærarum
Skúlin er helst týdningarmesti pallurin í SSP-samstarvinum, og allir skúlar hava tilknýti til ein SSP-lærara. Uppgávan hjá SSP-læraranum er yvirskipað at arbeiða við trivnaði og fyribyrging á øllum floksstigum í einstaka skúlanum.
SSP-lærarin hevur ávíst tímatal hvørja viku, sum verður nýtt til SSP-arbeiði. Tímatalið verður ásett út frá støddini á skúlanum.
SSP-lærarin skal:
- virka fyri góðum trivnaði og í samstarvi við Akt- lærarar, flokslærarar, stuðlar og flokstoymi at skipa fyri tiltøkum at fremja trivnað og fyribyrgja skaðandi atburð millum børn og ung.
- eygleiða, hvat rørir seg millum næmingar, hvussu samskift verður og veita starvsfólkum, næmingum og foreldrum vegleiðing í viðurskiftum, sum kunnu ávirka trivnaðin.
- kunna leiðslu og starvsfelagar um SSP-arbeiðið og luttaka á foreldrafundum eftir tørvi.
- luttaka í SSP-økisbólkinum og vera sambindingarlið millum skúlan og SSP-økisbólkin.
- undirvísa, ráðgeva og gera ætlan fyri SSP- arbeiðið í skúlanum sambært raðfestingum í Mál og mið og í samstarvi við SSP- ráðgevingina.
Meir kunning um SSP fæst á ssp.fo
SSP- lærari:
Áshild Kristiansen
Telefon: 580025
Teldupostur: ashild.kristiansen@skulin.fo
